main guftuguu huun ki tahriir ke jahaan men huun
— Adeem Hashmi
Main guftugoo huun ki tahreer ke jahaan men huun
Mujhe samajh to sahee main tiree zabaan men huun
Khud apnee saans ki ruktee hai apne chalne se
Ye kyaa ghuTan hai main kis tang se makaan men huun
Jilaa rahaa hai mare jism ko miraa hee kamaal
Main ek tiir huun TuuTee huee kamaan men huun
Guzar rahee hai mare sar se gaahakon kee nigaah
Zaraa see chiiz huun lekin baDee dukaan men huun
Mire qareeb se guzraa naheen hai sang-taraash
Mujassama huun main ab tak magar chaTaan men huun
Mujhee men guunj rahee hai mire sukhan kee sadaa
Navaa-e-garm huun main dasht-e-be-zabaan men huun
'adeem' baiThaa huaa huun paron ke Dher pe main
Khush is tarah huun ki jaise kisee uDaan men huun