mufaahamat na sikhaa jabr e naaravaa se mujhe

Mufaahamat na sikhaa jabr-e-naaravaa se mujhe Main sar-ba-kaf huun laDaa de kisee balaa se mujhe Zabaan ne jism kaa kuchh zahr to ugal Daalaa Bahut sukoon milaa talkhee-e-navaa se mujhe Rachaa huaa hai badan men abhee suroor-e-gunaah Abhee to khauf naheen aa.egaa sazaa se mujhe Main khaak se huun mujhe khaak jazb kar legee Agarche saans mile umr bhar havaa se mujhe Ghizaa isee men miree main isee zameen kee ghizaa Sadaa phir aatee hai kyuun parda-e-khalaa se mujhe Main jee rahaa huun abhee ai zameen-e-aadam-khor Abhee to dekh na too itnee ishtihaa se mujhe Bikhar chukaa huun main ab mujh ko mujtam.a kar le Too ab sameT bhee apnee kisee sadaa se mujhe Main mar rahaa huun phir aa.e sadaa-e-kun-fayakoon Banaayaa jaa.e miTaa ke phir ibtidaa se mujhe Main sar-ba-sajda huun ai 'shimr' mujh ko qatl bhee kar Rihaa.ee de bhee ab is ahd-e-karbalaa se mujhe Main kuchh naheen huun to phir kyuun mujhe banaayaa gayaa Ye poochhne kee ijaazat to ho khudaa se mujhe Main reza reza badan kaa uThaa rahaa huun 'adeem' Vo toD hee to gayaa apnee iltijaa se mujhe