tamaam umr kii tanhaaii kii sazaa de kar
— Adeem Hashmi
Tamaam umr kee tanhaa.ee kee sazaa de kar
TaDap uThaa miraa munsif bhee faisla de kar
Main ab maroon ki jiyoon mujh ko ye khushee hai bahut
Use sukoon to milaa mujh ko bad-duaa de kar
Main us ke vaaste sooraj talaash kartaa huun
Jo so gayaa miree aankhon ko rat-jagaa de kar
Vo raat raat kaa mehmaan to umr bhar ke liye
Chalaa gayaa mujhe yaadon kaa silsila de kar
Jo vaa kiyaa bhee dareecha to aaj mausam ne
PahaaD Dhaanp diyaa abr kee ridaa de kar
KaTee huee hai zameen koh se samundar tak
Milaa hai ghaav ye dariyaa ko raasta de kar
ChaTakh chaTakh ke jalee shaakh shaakh jangal kee
Bahut sharaar milaa aag ko havaa de kar
Phir is ke ba.ad pahaaD us ko khud pukaarenge
Too lauT aa use vaadee men ik sadaa de kar
Sutoon-e-reg na Thahraa 'adeem' chhat ke tale
Main Dah gayaa huun khud apne ko aasraa de kar