tere liye chale the ham tere liye thahar gae

Tere liye chale the ham tere liye Thahar ga.e Too ne kahaa to jee uThe too ne kahaa to mar ga.e KaT hee ga.ee judaa.ee bhee kab ye huaa ki mar ga.e Tere bhee din guzar ga.e mere bhee din guzar ga.e Too bhee kuchh aur aur hai ham bhee kuchh aur aur hain Jaane vo too kidhar gayaa jaane vo ham kidhar ga.e Raahon men hee mile the ham raahen naseeb ban ga.iin Vo bhee na apne ghar gayaa ham bhee na apne ghar ga.e Vaqt tiree judaa.ee kaa itnaa taveel ho gayaa Dil men tire visaal ke jitne the zakhm bhar ga.e Hotaa rahaa muqaabla paanee kaa aur pyaas kaa Sahraa umaD umaD paDe dariyaa biphar biphar ga.e Vo bhee ghubaar-e-khvaab thaa ham bhee ghubaar-e-khvaab the Vo bhee kaheen bikhar gayaa ham bhee kaheen bikhar ga.e Koee kanaar-e-aabjoo baiThaa huaa hai sar-nigoon Kashtee kidhar chalee ga.ee jaane kidhar bhanvar ga.e Aaj bhee intizaar kaa vaqt hunoot ho gayaa Aisaa lagaa ki hashr tak saare hee pal Thahar ga.e Baarish-e-vasl vo huee saaraa ghubaar dhul gayaa Vo bhee nikhar nikhar gayaa ham bhee nikhar nikhar ga.e Aab-e-muheet-e-ishq kaa bahr 'ajeeb bahr hai Taire to gharq ho ga.e Duube to paar kar ga.e Itne qareeb ho ga.e apne raqeeb ho ga.e Vo bhee 'adeem' Dar gayaa ham bhee 'adeem' Dar ga.e Us ke sulook par 'adeem' apnee hayaat o maut hai Vo jo milaa to jee uThe vo na milaa to mar ga.e