aashiq the shahr men jo puraane sharaab ke
— Adil Mansuri
Aashiq the shahr men jo puraane sharaab ke
Hain un ke dil men vasvase ab ehtisaab ke
Wo jo tumhaare haath se aa kar nikal gaya
Ham bhee qateel hain usee khaana-kharaab ke
Phoolon kee sej par zaraa aaraam kya kiyaa
Us gul-badan pe naqsh uTh aa.e gulaab ke
So.e to dil men ek jahaan jaagne lagaa
Jaage to apnee aankh men jaale the khvaab ke
Bas tishnagee kee aankh se dekhaa karo unhen
Dariya ravaan-davaan hain chamakte saraab ke
OkaaDa itnee duur na hota to ek din
Bhar laate saans saans men gul aaftaab ke
Kis tarah jam.a keejiye ab apne aap ko
Kaaghaz bikhar rahe hain puraanee kitaab ke