duur ufuq ke paar se awaaz ke parvardigaar
— Adil Mansuri
Duur ufuq ke paar se awaaz ke parvardigaar
Sadiyon soee khaamushee ko saamne aa kar pukaar
Jaane kin haathon ne khelaa raat saahil par shikaar
Sher kee awaaz ko tarsaa kiye suune kachhaar
Khvaab ke sookhe hue khaakon men lazzat kaa ghubaar
Niind ke deemak-zada gatte ke peechhe intizaar
Teergee kaise miTegee teree nusrat ke baghair
Aasmaan kee seeDhiyon se nuqra.ee faujen utaar
Aakhir-e-shab sab sitaare so rahe hain be-khabar
Koee sooraj ko khabar kar do ki ab shab-khoon maar
Phailtaa jaataa hai kirnon kaa sunahree jaal phir
Jagmagaa uTThee hain shamsheeren qataar-andar-qataar
Jaane kis ko DhoonDne daakhil huaa hai jism men
HaDDiyon men raasta kartaa huaa piilaa bukhaar
Jism kee miTTee na le jaa.e bahaa kar saath men
Dil kee gahraa.ee men girtaa khvaahishon kaa aabshaar