ghuum raha tha ek shakhs raat ke khaarzaar men
— Adil Mansuri
Ghuum raha tha ek shakhs raat ke khaarzaar men
Us kaa lahoo bhee mar gaya sub.h ke intizaar men
Ruuh kee khushk pattiyaan shaakh se TooTtee raheen
Aur ghaTaa baras ga.ee jism ke regzaar men
Rang men rang ghul ga.e aks ke sheeshe dhul ga.e
Qaus-e-quzah pighal ga.ee bheegee huee lagaar men
ThanDee saDak thee be-khabar garm dinon ke qahr se
Dhoop ko jhelte rahe peD khaDe qataar men
Bahtee havaa kee mauj men tair rahe the sabz ghar
Shahr ajiib saa lagaa raat chaDhe khumaar men
Niind bhee jaagtee rahi puure hue na khvaab bhee
Sub.h huee zameen par raat Dhalee mazaar men
Deta javaab kya koi mere sivaa na tha koi
Doob ke rah ga.ee sadaa tang siyaah ghaar men