phaile hue hain shahr men saae nidhaal se
— Adil Mansuri
Phaile hue hain shahr men saa.e niDhaal se
Jaa.en kahaan nikal ke khayaalon ke jaal se
Mashriq se meraa raasta maghrib kee samt thaa
Us kaa safar junoob kee jaanib shumaal se
Kaisaa bhee talkh zikr ho kaisee bhee tursh baat
Un kee samajh men aa.egee gul kee misaal se
Chup-chaap baiThe rahte hain Kuch bolte naheen
Bachche bigaD ga.e hain bahut dekh-bhaal se
Rangon ko bahte dekhiye kamre ke farsh par
Kirnon ke vaar rokiye sheeshe kee Dhaal se
Aankhon men aansuon kaa kaheen naam tak naheen
Ab juute saaf keejiye un ke rumaal se
Chehra bujhaa bujhaa saa pareshaan zulf zulf
Allaah dushmanon ko bachaa.e vabaal se
Phir paaniyon men nuqra.ee saa.e utar ga.e
Phir raat jagmagaa uThee chaandee ke thaal se