phir kisi khvaab ke parde se pukaaraa jaon
— Adil Mansuri
Phir kisee khvaab ke parde se pukaaraa jaaon
Phir kisee yaad kee talvaar se maaraa jaaon
Phir koi vus.at-e-aafaaq pe saaya Daale
Phir kisee aankh ke nuqte men utaaraa jaaon
Din ke hangaamon men daaman kaheen mailaa ho jaa.e
Raat kee nuqra.ee aatish men nikhaaraa jaaon
Khushk kho.e hue gumnaam jazeere kee tarah
Dard ke kaale samundar se ubhaaraa jaaon
Apnee khoee huee jannat kaa talabgaar banoon
Dast-e-yazdaan se gunahgaar sanvaaraa jaaon