wo barsaat ki shab wo pichhlaa pahar
— Adil Mansuri
Wo barsaat kee shab wo pichhlaa pahar
Andhere ke pahloo men sunsaan ghar
Khulenge abhee aur kis kis ke dar
Kahaan khatm hogaa lahoo kaa safar
Kuch apne aqaa.ed bhee kamzor the
Larazte the saa.e bhee deevaar par
Ujaale simaTte rahe aankh men
Sitaare bikharte rahe farsh par
Badan men pighaltee rahi chaandnee
Lahoo men sulagtee rahi dopahar
Kabhi khaak vaalon kee baaten bhee sun
Kabhi aasmaanon se neeche utar
Qadam ghar men rakhte hee ghaayal huaa
Gire Toot kar mujh pe deevaar-o-dar