ab ke ham bichhde to shaayad kabhi khawabon men milen
— Ahmad Faraz
Ab ke ham bichhDe to shaayad kabhi khawabon men milen
Jis tarah sookhe hue phuul kitaabon men milen
DhoonDh ujDe hue logon men wafa ke motee
Ye khazaane tujhe mumkin hai kharaabon men milen
Gham-e-Dunya bhee gham-e-yaar men shaamil kar lo
Nashsha baDhtaa hai sharaaben jo sharaabon men milen
Too khuda hai na miraa ishq farishton jaisaa
Donon insaan hain to kyuun itne hijaabon men milen
Aaj ham daar pe kheenche ga.e jin baaton par
Kya ajab kal wo zamaane ko nisaabon men milen
Ab na wo main na wo too hai na wo maazee hai 'faraaz'
Jaise do shakhs tamannaa ke saraabon men milen