Abhi Kuch aur karishme gazal ke dekhte hain

Abhee Kuch aur karishme ghazal ke dekhte hain 'faraaz' ab zaraa lahja badal ke dekhte hain Judaa.iyaan to muqaddar hain phir bhee jaan-e-safar Kuch aur duur zaraa saath chal ke dekhte hain Rah-e-wafa men hareef-e-khiraam koi to ho So apne aap se aage nikal ke dekhte hain Too saamne hai to phir kyuun yaqeen nahin aataa Ye baar baar jo aankhon ko mal ke dekhte hain Ye kaun log hain maujood teree mahfil men Jo laalachon se tujhe mujh ko jal ke dekhte hain Ye qurb kya hai ki yak-jaan hue na duur rahe Hazaar ek hee qaalib men Dhal ke dekhte hain Na tujh ko maat huee hai na mujh ko maat huee So ab ke donon hee chaalen badal ke dekhte hain Ye kaun hai sar-e-saahil ki Doobne vaale Samundaron kee tahon se uchhal ke dekhte hain Abhee talak to na kundan hue na raakh hue Ham apnee aag men har roz jal ke dekhte hain Bahut dinon se nahin hai Kuch us kee khair-khabar Chalo 'faraaz' ko ai yaar chal ke dekhte hain