agarche zor havaaon ne daal rakkhaa hai
— Ahmad Faraz
Agarche zor havaaon ne Daal rakkhaa hai
Magar charaagh ne lau ko sambhaal rakkhaa hai
Mohabbaton men to milnaa hai yaa ujaD jaanaa
Mizaaj-e-ishq men kab e'tidaal rakkhaa hai
Havaa men nashsha hee nashsha fazaa men rang hee rang
Ye kis ne pairahan apna uchhaal rakkhaa hai
Bhale dinon kaa bharosaa hee kya rahen na rahen
So main ne rishta-e-gham ko bahaal rakkhaa hai
Ham aise saada-dilon ko wo dost ho ki khuda
Sabhee ne waada-e-fardaa pe Taal rakkhaa hai
Hisaab-e-lutf-e-hareefaan kiyaa hai jab to khulaa
Ki doston ne ziyaada khayaal rakkhaa hai
Bharee bahaar men ik shaakh par khilaa hai gulaab
Ki jaise too ne hathelee pe gaal rakkhaa hai
'faraaz' ishq kee Dunya to khoob-soorat thee
Ye kis ne fitna-e-hijr-o-visaal rakkhaa hai