aisa hai ki sab khvaab musalsal nahin hote
— Ahmad Faraz
Aisa hai ki sab khvaab musalsal nahin hote
Jo aaj to hote hain magar kal nahin hote
Andar kee fazaaon ke karishme bhee ajab hain
Menh Toot ke barse bhee to baadal nahin hote
Kuch mushkilen aisee hain ki aasaan nahin hoteen
Kuch aise muamme hain kabhi hal nahin hote
Shaa.istagee-e-gham ke sabab aankhon ke sahraa
Namnaak to ho jaate hain jal-thal nahin hote
Kaise hee talaatum hon magar qulzum-e-jaan men
Kuch yaad-jazeere hain ki ojhal nahin hote
Ushshaaq ke maanind ka.ee ahl-e-havas bhee
Paagal to nazar aate hain paagal nahin hote
Sab khvaahishen puuree hon 'faraaz' aisa nahin hai
Jaise ka.ee ash.aar mukammal nahin hote