avval avval ki dostii hai Abhi
— Ahmad Faraz
Avval avval kee dostee hai abhee
Ik ghazal hai ki ho rahi hai abhee
Main bhee shahr-e-wafa men nau-vaarid
Wo bhee ruk ruk ke chal rahi hai abhee
Main bhee aisa kahaan kaa zood-shanaas
Wo bhee lagtaa hai sochtee hai abhee
Dil kee vaaraftagee hai apnee jagah
Phir bhee Kuch ehtiyaat see hai abhee
Garche pahlaa saa ijtinaab nahin
Phir bhee kam kam supurdagee hai abhee
Kaisaa mausam hai Kuch nahin khultaa
Boondaa-baandee bhee dhoop bhee hai abhee
Khud-kalaamee men kab ye nashsha thaa
Jis tarah roo-ba-roo koi hai abhee
Qurbaten laakh khoob-soorat hon
Dooriyon men bhee dilkashee hai abhee
Fasl-e-gul men bahaar pahlaa gulaab
Kis kee zulfon men Taanktee hai abhee
Muddaten ho ga.iin 'faraaz' magar
Wo jo deevaangee ki thee hai abhee