gila fuzuul thaa ahd e wafa ke hote hue
— Ahmad Faraz
Gila fuzool thaa ahd-e-wafa ke hote hue
So chup raha sitam-e-naa-ravaa ke hote hue
Ye qurbaton men ajab faasle paDe ki mujhe
Hai aashnaa kee talab aashnaa ke hote hue
Wo heela-gar hain jo majbooriyaan shumaar karen
Charaagh ham ne jalaa.e havaa ke hote hue
Na chaahne pe bhee tujh ko khuda se maang liyaa
Ye haal hai dil-e-be-mudda.aa ke hote hue
Na kar kisee pe bharosa ki kashtiyaan Dooben
Khuda ke hote hue naakhudaa ke hote hue
Magar ye ahl-e-riyaa kis qadar barahna hain
Galeem o dalq o abaa o qabaa ke hote hue
Kise khabar hai ki kaasa-ba-dast phirte hain
Bahut se log saron par humaa ke hote hue
'faraaz' aise bhee lamhe kabhee kabhee aa.e
Ki dil-girafta rahe dilrubaa ke hote hue