karoon na yaad magar kis tarah bhulaauun use
— Ahmad Faraz
Karoon na yaad magar kis tarah bhulaa.oon use
Ghazal bahaana karoon aur gungunaa.oon use
Wo khaar khaar hai shaakh-e-gulaab kee maanind
Main zakhm zakhm huun phir bhee gale lagaa.oon use
Ye log tazkire karte hain apne logon ke
Main kaise baat karoon ab kahaan se laa.oon use
Magar wo zood-faraamosh zood-ranj bhee hai
Ki rooth jaa.e agar yaad kuchh dilaa.oon use
Vahee jo daulat-e-dil hai vahee jo raahat-e-jaan
Tumhaaree baat pe ai naaseho ganvaa.oon use
Jo ham-safar sar-e-manzil bichhaD raha hai 'faraaz'
Ajab naheen hai agar yaad bhee na aa.uun use