kya aise kam sukhan se koi guftuguu kare
— Ahmad Faraz
Kya aise kam-sukhan se koee guftugoo kare
Jo mustaqil sukoot se dil ko lahoo kare
Ab to hamen bhee tark-e-maraasim kaa dukh naheen
Par dil ye chaahtaa hai ki aaghaaz too kare
Tere baghair bhee to ghaneemat hai zindagee
Khud ko ganvaa ke kaun tiree justujoo kare
Ab to ye aarzoo hai ki wo zakhm khaa.iye
Taa-zindagee ye dil na koee aarzoo kare
Tujh ko bhulaa ke dil hai wo sharminda-e-nazar
Ab koee haadsa hee tire roo-ba-roo kare
Chup-chaap apnee aag men jalte raho 'faraaz'
Dunya to arz-e-haal se be-aabroo kare