mayurka
— Ahmad Faraz
Mayurka ke saahilon pe kis qadar gulaab the
Ki khushbuen thee be-tarah ki rang be-hisaab the
Tunuk-libaasiyaan shanaavaron kee thiin qayaamaten
Tamaam seem-tan shareek-e-jashn-e-shahr-e-aab the
Shuaa-e-mahr kee ziyaa se the jigar jigar badan
Qamar-jamaal jin ke aks-e-raushnee ke baab the
Khulee fazaa kee dhoop wo ki jism saanvle kare
Butaan-e-aazaree ki mast-e-ghusl-e-aaftaab the
Yaheen pata chalaa ki ziist husn hai bahaar hai
Yaheen khabar huee ki zindagee ke dukh saraab the
Yaheen lagaa ki gardishon ke zaaviye badal ga.e
Na roz o shab kee talkhiyaan na waqt ke azaab the
Mire tamaam dost ajnabee rafaaqaton men gum
Miree nazar men tere khadd-o-khaal tere khvaab the
Main dooriyon ke baavajood tere aas paas tha
Mayurka ke saahilon pe main bahut udaas tha
Mayurka ke sahilon pe kis qadar gulab the
Ki KHushbuen thi be-tarah ki rang be-hisab the
Tunuk-libasiyan shanawaron ki thin qayamaten
Tamam sim-tan sharik-e-jashn-e-shahr-e-ab the
Shua-e-mahr ki ziya se the jigar jigar badan
Qamar-jamal jin ke aks-e-raushni ke bab the
Khuli faza ki dhup wo ki jism sanwle kare
Butan-e-azari ki mast-e-ghusl-e-aftab the
Yahin pata chala ki zist husn hai bahaar hai
Yahin KHabar hui ki zindagi ke dukh sarab the
Yahin laga ki gardishon ke zawiye badal gae
Na roz o shab ki talKHiyan na waqt ke azab the
Mere tamam dost ajnabi rafaqaton mein gum
Meri nazar mein tere KHadd-o-KHal tere KHwab the
Main duriyon ke bawajud tere aas pas tha
Mayurka ke sahilon pe main bahut udas tha