misaal e dast e zulekhaa tapaak chaahtaa hai
— Ahmad Faraz
Misaal-e-dast-e-zulekhaa tapaak chaahtaa hai
Ye dil bhee daaman-e-yoosuf hai chaak chaahtaa hai
Duaa.en do mire qaatil ko tum ki shahr kaa shahr
Usee ke haath se honaa halaak chaahtaa hai
Fasaana-go bhee kare kya ki har koi sar-e-bazm
Ma.aal-e-qissa-e-dil dardnaak chaahtaa hai
Idhar udhar se ka.ee aa rahi hain aavaazen
Aur us kaa dhyaan bahut inhimaak chaahtaa hai
Zaraa see gard-e-havas dil pe laazmee hai 'faraaz'
Wo ishq kya hai jo daaman ko paak chaahtaa hai