na hariif e jaan na shariik e gam shab e intizaar koi to ho

Na hareef-e-jaan na shareek-e-gham shab-e-intizaar koi to ho Kise bazm-e-shauq men laa.en ham dil-e-be-qaraar koi to ho Kise zindagee hai aziiz ab kise aarzoo-e-shab-e-tarab Magar ai nigaar-e-wafa talab tiraa aitbaar koi to ho Kaheen taar-e-daaman-e-gul mile to ye maan len ki chaman khile Ki nishaan fasl-e-bahaar kaa sar-e-shaakh-saar koi to ho Ye udaas udaas se baam o dar ye ujaaD ujaaD see rah-guzar Chalo ham nahin na sahee magar sar-e-koo-e-yaar koi to ho Ye sukoon-e-jaan kee ghaDee Dhale to charaagh-e-dil hee na bujh chale Wo balaa se ho gham-e-ishq yaa gham-e-rozgaar koi to ho Sar-e-maqtal-e-shab-e-aarzoo rahe kuch to ishq kee aabroo Jo nahin adoo to 'faraaz' too ki naseeb-e-daar koi to ho