qurbat bhi nahin dil se utar bhi nahin jaataa
— Ahmad Faraz
Qurbat bhee nahin dil se utar bhee nahin jaataa
Wo shakhs koi faisla kar bhee nahin jaataa
Aankhen hain ki khaalee nahin rahtee hain lahoo se
Aur zakhm-e-judaa.ee hai ki bhar bhee nahin jaataa
Wo raahat-e-jaan hai magar is dar-badaree men
Aisa hai ki ab dhyaan udhar bhee nahin jaataa
Ham dohree aziyyat ke giraftaar musaafir
Paanv bhee hain shal shauq-e-safar bhee nahin jaataa
Dil ko tiree chaahat pe bharosa bhee bahut hai
Aur tujh se bichhaD jaane kaa Dar bhee nahin jaataa
Paagal hue jaate ho 'faraaz' us se mile kya
Itnee see khushee se koi mar bhee nahin jaataa