ranjish hi sahii dil hi dukhaane ke liye aa
— Ahmad Faraz
Ranjish hee sahee dil hee dukhaane ke liye aa
Aa phir se mujhe chhoD ke jaane ke liye aa
Kuch to mire pindaar-e-mohabbat kaa bharam rakh
Too bhee to kabhee mujh ko manaane ke liye aa
Pahle se maraasim na sahee phir bhee kabhee to
Rasm-o-rah-e-Dunya hee nibhaane ke liye aa
Kis kis ko bataa.enge judaa.ee kaa sabab ham
Too mujh se khafaa hai to zamaane ke liye aa
Ik 'umr se hoon lazzat-e-girya se bhee mahroom
Ai raahat-e-jaan mujh ko rulaane ke liye aa
Ab tak dil-e-khush-fahm ko tujh se hain umeeden
Ye aakhiree sham'en bhee bujhaane ke liye aa