saaqiyaa ek nazar jaam se pahle pahle
— Ahmad Faraz
Saaqiyaa ek nazar jaam se pahle pahle
Ham ko jaanaa hai kaheen shaam se pahle pahle
Nau-giraftaar-e-wafa sa.i-e-rihaa.ee hai abas
Ham bhee uljhe the bahut daam se pahle pahle
Khush ho ai dil ki mohabbat to nibhaa dee too ne
Log ujaD jaate hain anjaam se pahle pahle
Ab tire zikr pe ham baat badal dete hain
Kitnee raghbat thee tire naam se pahle pahle
Saamne umr paDee hai shab-e-tanhaa.ee kee
Wo mujhe chhoD gaya shaam se pahle pahle
Kitnaa achchhaa thaa ki ham bhee jiyaa karte the 'faraaz'
Ghair-maaroof se gumnaam se pahle pahle