shoala thaa jal bujhaa hoon havaaen mujhe na do
— Ahmad Faraz
Sho.ala thaa jal-bujhaa hoon havaa.en mujhe na do
Main kab kaa jaa chukaa hoon sadaa.en mujhe na do
Jo zahr pee chukaa hoon tumheen ne mujhe diyaa
Ab tum to zindagee kee duaa.en mujhe na do
Ye bhee baDaa karam hai salaamat hai jism abhee
Ai khusravaan-e-shahr qabaa.en mujhe na do
Aisa na ho kabhee ki palaT kar na aa sakoon
Har baar duur jaa ke sadaa.en mujhe na do
Kab mujh ko e'tiraaf-e-mohabbat na thaa 'faraaz'
Kab main ne ye kahaa hai sazaa.en mujhe na do