silsile tod gaya wo sabhii jaate jaate
— Ahmad Faraz
Silsile toD gaya wo sabhee jaate jaate
Varna itne to maraasim the ki aate jaate
Shikva-e-zulmat-e-shab se to kaheen behtar thaa
Apne hisse kee koi sham.a jalaate jaate
Kitnaa aasaan thaa tire hijr men marnaa jaanaan
Phir bhee ik umr lagee jaan se jaate jaate
Jashn-e-maqtal hee na barpaa huaa varna ham bhee
Paa-ba-jaulaan hee sahee naachte gaate jaate
Is kee wo jaane use paas-e-wafa thaa ki na thaa
Tum 'faraaz' apnee taraf se to nibhaate jaate