sunaa hai log use aankh bhar ke dekhte hain

Sunaa hai log use aankh bhar ke dekhte hain So us ke shahr men Kuch din Thahar ke dekhte hain Sunaa hai rabt hai us ko kharaab-haalon se So apne aap ko barbaad kar ke dekhte hain Sunaa hai dard kee gaahak hai chashm-e-naaz us kee So ham bhee us kee galee se guzar ke dekhte hain Sunaa hai us ko bhee hai sher o shaa.iree se shaghaf So ham bhee mo.ajize apne hunar ke dekhte hain Sunaa hai bole to baaton se phuul jhaDte hain Ye baat hai to chalo baat kar ke dekhte hain Sunaa hai raat use chaand taktaa rahtaa hai Sitaare baam-e-falak se utar ke dekhte hain Sunaa hai din ko use titliyaan sataatee hain Sunaa hai raat ko jugnoo Thahar ke dekhte hain Sunaa hai hashr hain us kee ghazaal see aankhen Sunaa hai us ko hiran dasht bhar ke dekhte hain Sunaa hai raat se baDh kar hain kaakulen us kee Sunaa hai shaam ko saa.e guzar ke dekhte hain Sunaa hai us kee siyah-chashmagee qayaamat hai So us ko surma-farosh aah bhar ke dekhte hain Sunaa hai us ke labon se gulaab jalte hain So ham bahaar pe ilzaam dhar ke dekhte hain Sunaa hai aa.ina timsaal hai jabeen us kee Jo saada dil hain use ban-sanvar ke dekhte hain Sunaa hai jab se hamaa.il hain us kee gardan men Mizaaj aur hee laal o guhar ke dekhte hain Sunaa hai chashm-e-tasavvur se dasht-e-imkaan men Palang zaaviye us kee kamar ke dekhte hain Sunaa hai us ke badan kee taraash aisee hai Ki phuul apnee qabaa.en katar ke dekhte hain Wo sarv-qad hai magar be-gul-e-muraad naheen Ki us shajar pe shagoofe samar ke dekhte hain Bas ik nigaah se luTtaa hai qaafila dil kaa So rah-ravaan-e-tamannaa bhee Dar ke dekhte hain Sunaa hai us ke shabistaan se muttasil hai bahisht Makeen udhar ke bhee jalve idhar ke dekhte hain Ruke to gardishen us kaa tavaaf kartee hain Chale to us ko zamaane Thahar ke dekhte hain Kise naseeb ki be-pairahan use dekhe Kabhee kabhee dar o deevaar ghar ke dekhte hain Kahaaniyaan hee sahee sab mubaalghe hee sahee Agar wo khvaab hai taabeer kar ke dekhte hain Ab us ke shahr men Thahren ki kuuch kar jaa.en 'faraaz' aao sitaare safar ke dekhte hain