tere qariib aa ke badii uljhanon men hoon

Tere qareeb aa ke baDee uljhanon men hoon Main dushmanon men hoon ki tire doston men hoon Mujh se gurez-paa hai to har raasta badal Main sang-e-raah hoon to sabhee raaston men hoon Too aa chukaa hai sat.h pe kab se khabar naheen Bedard main abhee unheen gahraa.iyon men hoon Ai yaar-e-khush-dayaar tujhe kya khabar ki main Kab se udaasiyon ke ghane jangalon men hoon Too luuT kar bhee ahl-e-tamannaa ko khush naheen Yaan luT ke bhee wafa ke inhee qaafilon men hoon Badlaa na mere baad bhee mauzoo-e-guftugoo Main jaa chukaa hoon phir bhee tiree mahfilon men hoon Mujh se bichhaD ke too bhee to ro.egaa umr bhar Ye soch le ki main bhee tiree khvaahishon men hoon Too hans raha hai mujh pe miraa haal dekh kar Aur phir bhee main shareek tire qahqahon men hoon Khud hee misaal-e-laala-e-sahraa lahoo lahoo Aur khud 'faraaz' apne tamaashaa.iyon men hoon