tujh se bichhad ke ham bhi muqaddar ke ho gae
— Ahmad Faraz
Tujh se bichhaD ke ham bhee muqaddar ke ho ga.e
Phir jo bhee dar milaa hai usee dar ke ho ga.e
Phir yuun huaa ki ghair ko dil se lagaa liyaa
Andar wo nafraten thiin ki baahar ke ho ga.e
Kya log the ki jaan se baDh kar 'azeez the
Ab dil se mahv naam bhee aksar ke ho ga.e
Ai yaad yaar tujh se karen kya shikaayaten
Ai dard-e-hijr ham bhee to patthar ke ho ga.e
Samjhaa rahe the mujh ko sabhee naasehaan-e-shahr
Phir rafta rafta khud usee kaafar ke ho ga.e
Ab ke na intizaar karen chaaragar ki ham
Ab ke ga.e to koo-e-sitamgar ke ho ga.e
Rote ho ik jazeera-e-jaan ko 'faraaz' tum
Dekho to kitne shahr samundar ke ho ga.e