tujh se mil kar to ye lagtaa hai ki ai ajnabii dost
— Ahmad Faraz
Tujh se mil kar to ye lagtaa hai ki ai ajnabee dost
Too miree pahlee mohabbat thee miree aakhiree dost
Log har baat kaa afsaana banaa dete hain
Ye to Dunya hai miree jaan ka.ee dushman ka.ee dost
Tere qaamat se bhee lipTee hai amar-bel koee
Meree chaahat ko bhee Dunya kee nazar khaa ga.ee dost
Yaad aa.ee hai to phir Toot ke yaad aa.ee hai
Koee guzree huee manzil koee bhoolee huee dost
Ab bhee aa.e ho to ehsaan tumhaaraa lekin
Wo qayaamat jo guzarnee thee guzar bhee ga.ee dost
Tere lahje kee thakan men tiraa dil shaamil hai
Aisa lagtaa hai judaa.ee kee ghaDee aa ga.ee dost
Baarish-e-sang kaa mausam hai mire shahr men to
Too ye sheeshe saa badan le ke kahaan aa ga.ee dost
Main use ahd-shikan kaise samajh luun jis ne
Aakhiree khat men ye likkhaa thaa faqat aap kee dost