us ne sukuut e shab men bhi apna payaam rakh diyaa

Us ne sukoot-e-shab men bhee apna payaam rakh diyaa Hijr kee raat baam par maah-e-tamaam rakh diyaa Aamad-e-dost kee naved koo-e-wafa men aam thee Main ne bhee ik charaagh saa dil sar-e-shaam rakh diyaa Shiddat-e-tishnagee men bhee ghairat-e-mai-kashee rahi Us ne jo pher lee nazar main ne bhee jaam rakh diyaa Us ne nazar nazar men hee aise bhale sukhan kahe Main ne to us ke paanv men sara kalaam rakh diyaa Dekho ye mere khvaab the dekho ye mere zakhm hain Main ne to sab hisaab-e-jaan bar-sar-e-aam rakh diyaa Ab ke bahaar ne bhee kiin aisi sharaarten ki bas Kabk-e-daree kee chaal men teraa khiraam rakh diyaa Jo bhee milaa usee kaa dil halqa-ba-gosh-e-yaar tha Us ne to saare shahr ko kar ke ghulaam rakh diyaa Aur 'faraaz' chaahiyen kitnee mohabbaten tujhe Maaon ne tere naam par bachchon kaa naam rakh diyaa