vahshaten badhtii gaiin hijr ke aazaar ke saath
— Ahmad Faraz
Vahshaten baDhtee ga.iin hijr ke aazaar ke saath
Ab to ham baat bhee karte naheen gham-khvaar ke saath
Ham ne ik umr basar kee hai gham-e-yaar ke saath
'meer' do din na jiye hijr ke aazaar ke saath
Ab to ham ghar se nikalte hain to rakh dete hain
Taaq par izzat-e-saadaat bhee dastaar ke saath
Is qadar khauf hai ab shahr kee galiyon men ki log
Chaap sunte hain to lag jaate hain deevaar ke saath
Ek to khvaab liye phirte ho galiyon galiyon
Us pe takraar bhee karte ho khareedaar ke saath
Shahr kaa shahr hee naaseh ho to kya keejiyegaa
Varna ham rind to bhiD jaate hain do-chaar ke saath
Ham ko us shahr men ta.ameer kaa sauda hai jahaan
Log me.amaar ko chun dete hain deevaar ke saath
Jo sharaf ham ko milaa koocha-e-jaanaan se 'faraaz'
Soo-e-maqtal bhee ga.e hain usee pindaar ke saath