ashk daaman men bhare khvaab kamar par rakkhaa
— Ahmad Mushtaq
Ashk daaman men bhare khvaab kamar par rakkhaa
Phir qadam ham ne tiree raahguzar par rakkhaa
Ham ne ik haath se thaamaa shab-e-gham kaa aanchal
Aur ik haath ko daamaan-e-sahar par rakkhaa
Chalte chalte jo thake paanv to ham baith ga.e
Niind gaThree pe dharee khvaab shajar par rakkhaa
Jaane kis dam nikal aa.e tire rukhsaar kee dhoop
Muddaton dhyaan tire saaya-e-dar par rakkhaa
Jaate mausam ne palaT kar bhee na dekhaa 'mushtaaq'
Rah gaya saaghar-e-gul sabza-e-tar par rakkhaa