bhaagne kaa koi rasta nahin rehne dete
— Ahmad Mushtaq
Bhaagne kaa koi rasta nahin rehne dete
Koi dar koi dareecha nahin rehne dete
Aasmaan par se miTaa dete hain taaron kaa suraagh
Ret par naqsh-e-kaf-e-paa nahin rehne dete
Koi tasveer mukammal nahin hone paatee
Dhoop dete hain to saayaa nahin rehne dete
Pahle bhar dete hain saamaan-e-do-aalam dil men
Phir kisee shai kee tamannaa nahin rehne dete
Shahr-e-koraan men bhee aa.eena farosh aate hain
Be-tajallee koi qarya nahin rehne dete
Toor-e-seenaa ho ki aatish-kada-e-soz-e-nihaan
Raakh rah jaatee hai sho.ala nahin rehne dete