chhat gaya abr shafaq khul gaii taare nikle
— Ahmad Mushtaq
ChhaT gaya abr shafaq khul ga.ee taare nikle
Band kamron se tire dard ke maare nikle
Shaakh par pankhuDiyaan hon ki palak par aansoo
Tere daaman kee jhalak dekh ke saare nikle
Too agar paas naheen hai kaheen maujood to hai
Tere hone se baDe kaam hamaare nikle
Tere honTon meree aankhon se na badlee Dunya
Phir vahee phuul khile phir vahee taare nikle
Rah ga.ee laaj miree arz-e-wafa kee 'mushtaaq'
Khaamushee se tiree kya kya na ishaare nikle