chhin gaii terii tamannaa bhi tamannaaii se
— Ahmad Mushtaq
Chhin ga.ee teree tamannaa bhee tamannaa.ee se
Dil bahalte hain kaheen hausla-afzaa.ee se
Kaisaa raushan tha tiraa niind men Duubaa chehra
Jaise ubhraa ho kisee khvaab kee gahraa.ee se
Vahee aashufta-mizaajee vahee khushiyaan vahee gham
Ishq kaa kaam liyaa ham ne shanaasaa.ee se
Na kabhee aankh bhar aa.ee na tiraa naam liyaa
Bach ke chalte rahe har koocha-e-rusvaa.ee se
Hijr ke dam se salaamat hai tire vasl kee aas
Tar-o-taaza hai khushee gham kee tavaanaa.ee se
Khil ke murjhaa bhee ga.e fasl-e-mulaaqaat ke phuul
Ham hee faarigh na hue mausam-e-tanhaa.ee se