dil men wo shor na aankhon men wo nam rahtaa hai
— Ahmad Mushtaq
Dil men wo shor na aankhon men wo nam rahtaa hai
Ab tap-e-hijr tavaqqo se bhee kam rahtaa hai
Kabhee sho.ale se lapakte the mire siine men
Ab kisee vaqt dhuaan saa koee dam rahtaa hai
Kya khuda jaane mire dil ko huaa tere ba.ad
Na khushee is men Thahartee hai na gham rahtaa hai
Rishta-e-taar-e-tamannaa naheen TuuTaa ab tak
Ab bhee aankhon men tiree zulf kaa kham rahtaa hai
ChhoD jaatee hai har ik rut koee khushboo koee rang
Na sitam rahtaa hai baaqee na karam rahtaa hai