ik umr ki aur zaruurat hai vahii shaam o sahar karne ke liye
— Ahmad Mushtaq
Ik umr kee aur zaroorat hai vahee shaam-o-sahar karne ke liye
Wo baat jo tum se kah na sake use baar-e-digar karne ke liye
Kabhee zikr kiyaa tiree zulfon kaa aur jaatee shaam ko rok liyaa
Kabhee yaad kiyaa tire chehre ko aaghaaz-e-sahar karne ke liye
Fot-paath pe bhee sone na diyaa tire shahr ke izzat-daaron ne
Ham kitnee duur se aa.e the ik raat basar karne ke liye
Us aankh ne jis kee qismat men sach-much ke dar-o-deevaar na the
Khawabon ke nagar aabaad kiye hasrat kee nazar karne ke liye
Is behis Dunya ke aage kisee lahr kee pesh naheen jaatee
Ab bahr kaa bahr uchhaal koee ise zer-o-zabar karne ke liye