kahiin ummiid sii hai dil ke nihaan khaane men
— Ahmad Mushtaq
Kaheen ummeed see hai dil ke nihaan khaane men
Abhee Kuch vaqt lagegaa use samjhaane men
Mausam-e-gul ho ki patjhaD ho balaa se apnee
Ham ki shaamil hain na khilne men na murjhaane men
Ham se makhfee nahin Kuch rahguzar-e-shauq kaa haal
Ham ne ik umr guzaaree hai havaa khaane men
Hai yoonhee ghoomte rehne kaa maza hee Kuch aur
Aisi lazzat na pahunchne men na rah jaane men
Na.e deevaanon ko dekhen to khushee hotee hai
Ham bhee aise hee the jab aa.e the veeraane men
Mausamon kaa koi mahram ho to us se poochho
Kitne patjhaD abhee baaqee hain bahaar aane men