kaise unhen bhulaauun mohabbat jinhon ne ki

Kaise unhen bhulaa.oon mohabbat jinhon ne kee Mujh ko to wo bhee yaad hain nafrat jinhon ne kee Dunya men ehtiraam ke qaabil wo log hain Ai zillat-e-wafa tiree izzat jinhon ne kee Tazeen-e-kaa.enaat kaa baa.is vahee bane Dunya se ikhtilaaf kee jur.at jinhon ne kee Aasoodgaan-e-manzil-e-lailaa udaas hain Achchhe rahe, na tai ye masaafat jinhon ne kee Ahl-e-havas to khair havas men hue zaleel Wo bhee hue kharaab, mohabbat jinhon ne kee