khair auron ne bhi chaahaa to hai tujh saa honaa
— Ahmad Mushtaq
Khair auron ne bhee chaahaa to hai tujh saa honaa
Ye alag baat ki mumkin nahin aisa honaa
Dekhtaa aur na Thahartaa to koi baat bhee thee
Jis ne dekhaa hee nahin us se khafaa kya honaa
Tujh se duuree men bhee khush rahtaa hoon pahle kee tarah
Bas kisee vaqt buraa lagtaa hai tanhaa honaa
Yuun meree yaad men mahfooz hain tere khad-o-khaal
Jis tarah dil men kisee shai kee tamannaa honaa
Zindagee marka-e-rooh-o-badan hai 'mushtaaq'
Ishq ke saath zarooree hai havas kaa honaa