khvaab ke phuulon ki taabiiren kahaanii ho gaiin
— Ahmad Mushtaq
Khvaab ke phoolon kee ta.abeeren kahaanee ho ga.iin
Khoon ThanDaa paD gaya aankhen puraanee ho ga.iin
Jis kaa chehra thaa chamakte mausamon kee aarzoo
Us kee tasveeren bhee auraaq-e-khizaanee ho ga.iin
Dil bhar aayaa kaaghaz-e-khaalee kee soorat dekh kar
Jin ko likhnaa thaa wo sab baaten zabaanee ho ga.iin
Jo muqaddar thaa use to roknaa bas men na thaa
Un kaa kya karte jo baaten naa-gahaanee ho ga.iin
Rah gaya 'mushtaaq' dil men rang-e-yaad-e-raftagaan
Phuul mahnge ho ga.e qabren puraanee ho ga.iin