kis shai pe yahaan vaqt kaa saaya nahin hota

Kis shai pe yahaan vaqt kaa saaya naheen hota Ik khvaab-e-mohabbat hai ki booDhaa naheen hota Wo vaqt bhee aataa hai jab aankhon men hamaaree Phirtee hain wo shaklen jinhen dekhaa naheen hota Baarish wo barastee hai ki bhar jaate hain jal-thal Dekho to kaheen abr kaa TukDaa naheen hota Ghir jaataa hai dil dard kee har band galee men Chaaho ki nikal jaa.en to rasta naheen hota Yaadon pe bhee jam jaatee hai jab gard-e-zamaana Miltaa hai wo paighaam ki pahunchaa naheen hota Tanhaa.ee men karnee to hai ik baat kisee se Lekin wo kisee vaqt akelaa naheen hota Kya us se gila keejiye barbaadee-e-dil kaa Ham se bhee to iz.haar-e-tamannaa naheen hota