ye ham gazal men jo harf o bayaan banaate hain
— Ahmad Mushtaq
Ye ham ghazal men jo harf-o-bayaan banaate hain
Havaa-e-gham ke liye khiDkiyaan banaate hain
Unhen bhee dekh kabhee ai nigaar-e-shaam-e-bahaar
Jo ek rang se tasveer-e-jaan banaate hain
Nigaah-e-naaz Kuch un kee bhee hai khabar tujh ko
Jo dhoop men hain magar badliyaan banaate hain
Hamaaraa kya hai jo hota hai jee udaas bahut
To gul taraashte hain titliyaan banaate hain
Kisee tarah naheen jaatee fasurdagee dil kee
To zard rang kaa ik aasmaan banaate hain
Dil-e-sitam-zada kya hai lahoo kee buund to hai
Is ek buund ko ham be-karaan banaate hain
Balaa kee dhoop thee din bhar to saa.e bunte the
Andheree raat hai chingaariyaan banaate hain
Hunar kee baat jo poochho to mukhtasar ye hai
Kasheed karte hain aag aur dhuaan banaate hain