ye kaun khvaab men chhuu kar chalaa gaya mire lab
— Ahmad Mushtaq
Ye kaun khvaab men chhoo kar chalaa gaya mire lab
Pukaartaa hoon to dete nahin sadaa mire lab
Ye aur baat kisee ke labon talak na ga.e
Magar qareeb se guzre hain baar-haa mire lab
Ab us kee shakl bhee mushkil se yaad aatee hai
Wo jis ke naam se hote na the judaa mire lab
Ab ek umar se guft-o-shuneed bhee to nahin
Hain be-naseeb mire kaan be-navaa mire lab
Ye shaakhsaana-e-vahm-o-gumaan thaa shaayad
Kujaa wo samra-e-baagh-e-talab kujaa mire lab