ab to shahron se khabar aatii hai diivaanon ki
— Ahmad Nadeem Qasmi
Ab to shahron se khabar aatee hai deevaanon kee
Koi pahchaan hee baaqee nahin veeraanon kee
Apnee poshaak se hushyaar ki khuddaam-e-qadeem
Dhajjiyaan maangte hain apne garebaanon kee
San.aten phailtee jaatee hain magar is ke saath
Sarhaden TooTtee jaatee hain gulistaanon kee
Dil men wo zakhm khile hain ki chaman kya shai hai
Ghar men baaraat see utree huee gul-daanon kee
Un ko kya fikr ki main paar lagaa yaa Duubaa
Bahs karte rahe saahil pe jo toofaanon kee
Teree rahmat to musallam hai magar ye to bataa
Kaun bijlee ko khabar deta hai kaashaanon kee
Maqbare bante hain zindon ke makaanon se buland
Kis qadar auj pe takreem hai insaanon kee
Ek ik yaad ke haathon pe charaaghon bhare tasht
Ka.aba-e-dil kee fazaa hai ki sanam-khaanon kee