ajiib rang tire husn kaa lagaav men thaa
— Ahmad Nadeem Qasmi
Ajiib rang tire husn kaa lagaav men thaa
Gulaab jaise kaDee dhoop ke alaav men thaa
Hai jis kee yaad miree fard-e-jurm kee surkhee
Usee kaa aks mire ek ek ghaav men thaa
Yahaan vahaan se kinaare mujhe bulaate rahe
Magar main vaqt kaa Dariya thaa aur bahaav men thaa
Uroos-e-gul ko sabaa jaise gudgudaa ke chalee
Kuch aisa pyaar kaa aalam tire subhaav men thaa
Main pur-sukoon hoon magar meraa dil hee jaantaa hai
Jo intishaar mohabbat ke rakh-rakhaav men thaa
Ghazal ke ruup men tahzeeb gaa rahi thee 'nadeem'
Miraa kamaal mire fan ke is rachaav men thaa