duaa
— Ahmad Nadeem Qasmi
Mujhe too muzhda-e-kaifiyyat-e-davaamee de
Mire khuda mujhe e.azaaz-e-naa-tamaamee de
Main tere chashma-e-rahmat se kaam kaam rahoon
Kabhee kabhi mujhe ehsaas-e-tishna-kaamee de
Mujhe kisee bhee muazzaz kaa ham-rikaab na kar
Main khud kamaa.oon jise bas wo nek-naamee de
Vo log jo ka.ee sadiyon se hain nasheb-nasheen
Buland hoon to mujhe bhee buland-baamee de
Tiree zameen ye tere chaman rahen aabaad
Jo dasht-e-dil hai use bhee too laala-faamee de
BaDaa suroor sahee tujh se ham-kalaamee men
Bas ek baar magar zauq-e-khud-kalaamee de
Main doston kee tarah khaak uDaa nahin saktaa
Main gard-e-raah sahee mujh ko narm-gaamee de
Agar giroon to kuch is tarah sar buland giroon
Ki maar kar miraa dushman mujhe salaamee de
Mujhe tu muzhda-e-kaifiyyat-e-dawami de
Mere KHuda mujhe eazaz-e-na-tamami de
Main tere chashma-e-rahmat se kaam kaam rahun
Kabhi kabhi mujhe ehsas-e-tishna-kaami de
Mujhe kisi bhi muazzaz ka ham-rikab na kar
Main KHud kamaun jise bas wo nek-nami de
Wo log jo kai sadiyon se hain nasheb-nashin
Buland hun to mujhe bhi buland-baami de
Teri zamin ye tere chaman rahen aabaad
Jo dasht-e-dil hai use bhi tu lala-fami de
BaDa surur sahi tujh se ham-kalami mein
Bas ek bar magar zauq-e-KHud-kalami de
Main doston ki tarah KHak uDa nahin sakta
Main gard-e-rah sahi mujh ko narm-gami de
Agar girun to kuch is tarah sar buland girun
Ki mar kar mera dushman mujhe salami de