ehsaas men phuul khil rahe hain
— Ahmad Nadeem Qasmi
Ehsaas men phuul khil rahe hain
PatjhaD ke 'ajeeb silsile hain
Kuch itnee shadeed teergee hai
Aankhon men sitaare tairte hain
Dekhen to havaa jamee huee hai
Sochen to darakht jhoomte hain
Suqraat ne zahr pee liyaa thaa
Ham ne jiine ke dukh sahe hain
Ham tujh se bigaD ke jab bhee uTThe
Phir tere huzoor aa ga.e hain
Ham 'aks hain ek doosre kaa
Chehre ye nahin hain aa.ine hain
Lamhon kaa ghubaar chhaa raha hai
Yaadon ke charaagh jal rahe hain
Sooraj ne ghane sanobaron men
Jaale se shu'aa'on ke bune hain
Yaksaan hain firaaq-o-vasl donon
Ye marhale ek se kaDe hain
Paa kar bhee to niind uD ga.ee thee
Kho kar bhee to rat-jage mile hain
Jo din tiree yaad men kaTe the
Maazee ke khanDar bane khaDe hain
Jab teraa jamaal DhoonDte the
Ab teraa khayaal DhoonDte hain
Ham dil ke gudaaz se hain majboor
Jab khush bhee hue to ro.e hain
Ham zinda hain ai firaaq kee raat
Pyaaree tire baal kyuun khule hain