gul tiraa rang churaa laae hain gulzaaron men
— Ahmad Nadeem Qasmi
Gul tiraa rang churaa laa.e hain gulzaaron men
Jal raha hoon bharee barsaat kee bauchhaaron men
Mujh se katraa ke nikal jaa magar ai jaan-e-hayaa
Dil kee lau dekh raha hoon tire rukhsaaron men
Husn-e-be-gaana-e-ehsaas-e-jamaal achchhaa hai
Ghunche khilte hain to bik jaate hain baazaaron men
Zikr karte hain tiraa mujh se ba-unvaan-e-jafaa
Chaara-gar phuul piro laa.e hain talvaaron men
Zakhm chhup sakte hain lekin mujhe fan kee saugand
Gham kee daulat bhee hai shaamil mire shahkaaron men
Muntazir hain ki koee tesha-e-takhleeq uThaa.e
Kitne asnaam abhee dafn hain kohsaaron men
Mujh ko nafrat se naheen pyaar se masloob karo
Main to shaamil hoon mohabbat ke gunahgaaron men